واٹس ایپ میں دو نئے زبردست فیچرز شامل کیے جا رہے ہیں

 

واٹس ایپ میں دو نئے زبردست فیچرز شامل کیے جا رہے ہیں

واٹس ایپ میں دو نئے زبردست فیچرز شامل کیے جا رہے ہیں جو صارفین کے لیے انتہائی مفید ثابت ہوں گے۔

ان میں سے ایک فیچر صارفین کی سیکیورٹی اور پرائیویسی کو بہتر بنائے گا، جبکہ دوسرا فیچر صارفین کو اپنے جذبات کو اسٹیٹس پر زیادہ آسانی سے ظاہر کرنے کا موقع فراہم کرے گا۔

یہ بات ذہن میں رکھیں کہ واٹس ایپ کو دنیا بھر میں 2 ارب سے زیادہ لوگ استعمال کرتے ہیں، اور اکثر لوگ اس ایپ پر نامعلوم اکاؤنٹس سے موصول ہونے والے پیغامات کے بارے میں فکر مند رہتے ہیں۔ اسی وجہ سے، میٹا کی ملکیت والی اس میسجنگ ایپ نے صارفین کی حفاظت اور پرائیویسی کے لیے ایک نیا زبردست فیچر متعارف کرایا ہے۔

اس نئے فیچر کا نام "بلاک ان نو اکاؤنٹ میسجز" ہے، اور یہ فیچر حال ہی میں اینڈرائیڈ ڈیوائسز کے لیے واٹس ایپ کے بیٹا ورژن میں شامل کیا گیا ہے۔ اس فیچر کے ذریعے صارفین نامعلوم اکاؤنٹس سے موصول ہونے والے پیغامات کو بلاک کر سکیں گے۔ جب کسی نامعلوم اکاؤنٹ سے موصول ہونے والے پیغامات کی تعداد ایک مخصوص حد سے زیادہ ہو جائے گی، تو یہ فیچر خود بخود ان پیغامات کو بلاک کر دے گا۔

رپورٹ کے مطابق، اس فیچر پر ابھی کام جاری ہے اور یہ فی الحال بیٹا ورژن استعمال کرنے والے صارفین کے لیے بھی دستیاب نہیں ہے، اس لیے یہ کہنا مشکل ہے کہ اسے کب تمام صارفین کے لیے جاری کیا جائے گا۔

ایک اور نیا فیچر اسٹیٹس پر فوری ردعمل دینے کا ہے۔ یہ فیچر بھی اینڈرائیڈ ڈیوائسز کے لیے واٹس ایپ کے بیٹا ورژن میں متعارف کرایا گیا ہے۔

رپورٹس کے مطابق، جب آپ کسی اسٹیٹس کو دیکھیں گے، تو آپ جواب کے ٹیکسٹ باکس کے ساتھ دل کے نشان والے بٹن پر کلک کر کے اسے پسند کر سکیں گے۔ جب کوئی صارف آپ کے اسٹیٹس پر ردعمل ظاہر کرے گا، تو آپ اسے اسٹیٹس ویورز کی فہرست میں دیکھ سکیں گے، بالکل اسی طرح جیسے انسٹاگرام اسٹوریز میں ہوتا ہے۔